April, April

All in‘t Olle Rom geef dat Dåch, an dei alleilei Spijök dräben wür un dor sünd ok dei Wöddeln för »April, April« tau säuken. Anner willen weiten, dat 1530 up‘n Augsbörger Rieksdach dat Münzwäsen nie rägelt warden süll un as dei Münzdach denn an‘n 1. April nich afhollen wür, hett ‚n dei Geldspekulanten mit »April, April!« up‘n Arm nåhmen. Vertellt ward ok, dat dei franzöösch König Heinrich IV. an einen 1. April ‘n Diern von 16 Johr dei Bidd nich afschlöch, mit em ‘n Nacht tau verbringen. Un as dat denn so wiet wier, stünn nich dei lütte Diern, sonnern dei ganze Hoffstaat mit sien Fru Maria von Medici vör em. Dor künn man denn ok von »April, April!« snacken! Noch anner gåhn dorvon ut, dat Judas Iskariot - einer von Jesus sien 12 Jüngers - an einen 1. April up‘e Welt keem un sik denn ok an einen 1. April upknüppt hett un ut dissen Grund dei 1. April ‘n Unglücksdach is. Hentau kümmt noch, dat an dissen Dach ok noch Satan ut‘n Häben inne Höll‘ stött‘t wür. Nich tauletzt möt ok dei Wäderrägel »April, April måkt wat hei will« herhollen. Un inne Wirtschaft un Poletik is dat nich anners. Wenn du denkst, dat du di för fief Euros wat leisten kannst denn œwerrascht di »April, April« ok ümmer wedder, denn för‘n Bratwust in‘n Semmel orrer ‘n Fischsemmel möst du bet tau fief Euros in dien Kniep säuken. Gor nich taurecht kümmst du an‘n Timmendörper Strand, wo ‘n Currywust mit Toffelsticken bet au 16,00 Euro kosten kann, man taun Oktoberfest up‘e Wiesn tau München för‘t Maß Bier twüschen 13.60 un 15.30 € un för ‘n Liter Wåder bet tau elben Euros henblädern möt. Un bi 50 Euros för twei Pund Spickaal heit dat ok »April, April«, denn dei kost‘t nu all bet tau 7,50 Euro för 100 g. Ok inne Poletik, wieder nix as »April, April!« Wat hett dat Wåhlkvolk up dei Gräunen as Ümweltredder un Frädensapostel sett‘t un vonne Oppositschon inne Regierung wesselt, wür dat düütsche Volk von denn Dichter un Denker Robert un Panzer-Toni un dei gräunen »Girls« Annalena, Katharina, Claudia, Britta u.a. anschäten. Wat sünd dei Gräunen inne rod-gräun-gäle Ampel mit eins ganz wild up Uprüstung, dormit‘s denn utmåkten Fiend Putin so inne Predulch bringen, dat em dei Lust vergeiht, uns wat antaudaun. Putin kricht sogor dei Schuld, wenn ‘n Klappräkner in‘n Ministerium nich so mitspält as hei dat süll orrer em ward nåsecht, dat hei wat utspioniert, wenn ‘n Düütscher mit Drohnen Rehkitzen vör‘n Dod redden will. Un man möt nich versäuken, mit Putin tau verhanneln, sonnern man œwerlött denn Fründ Wolodymyr ümmer mihr Waffen un Munitschon, dormit dat ümmer mihr Dode, Blessierte un Steinbülten (Ruinen) gifft. An‘t Grundgesetz vörbi, gifft dat ünner Kanzler Olaf taun iersten Mål ‘n 100 Milljarden Sonnervermögen för dei Uprüstung, dei gäle Finanzer will dei Schullenbrems nich wieder lockern, dat gifft Krach, dei Ampel is kaputt un Niewåhlen ståhn in‘t Hus. Un dei Schwatten widdern Morgenluft: Merz is dei Kannedat un gifft tau verståhn, dat hei nix mit dei Gräunen an‘n Haut hett un dat hei dei Schullebrems nich upweiken will. Man glöwt em un doch is hei nich dei ganz grote Sieger. Wat daun? Man besinnt sik up Groko-Tieden, måkt ‚n Kihrtwenn von 180 Gråd ward Roden as dei Sœch dörch Dörp drieben, Schullenbrems ade, klüngelt mit dei Gräunen un pietsch mit ‘n ollen Bunnesdach 500 Milljarden Sonnervermögen för dei Rüstung un 500 Milljarden för dei Infrastruktur dörch, dormit dei Panzer denn ok rullen kœnen. So ward nu ut dei einstig Groko dei Schuko (Schullenkoalitschon) un dat Wåhlvolk is wedder anschäten, äben wedder »April, April!« Un so måkt »April, April« allens, dat dat Wåhlvolk bald keineinen vonne Midd mihr trugen deit un so sachtens mit »April, April!« dei Ränner tau dei niege Midd måkt.

Behrend Böckmann, Kirch Rosin, 02.04.2025